Entre os días 3 e 5 de xullo de 2025, tivo lugar o I Encontro Internacional “Memórias de Música: casas-museu no espaço ibérico”, que se celebrou no Museo Nacional Soares dos Reis, a Facultade de Letras (Universidade do Porto) e a Igrexa de Santa Clara. Este evento de carácter interdisciplinar contou coa colaboración económica do Grupo Organistrum, así como implicou a participación de varios dos seus membros. Javier Gándara Feijóo foi co-organizador da mencionada reunión académica xunto a investigadores do CITCEM-Universidade do Porto e o ARTIS-Universidade de Lisboa, liderados por Ana Cristina de Sousa. Montserrat Capelán e Ana Liberal participaron con sendas comunicacións tituladas “Del archivo doméstico al archivo institucional: el Fondo Andrés Gaos” e “Orpheon Portuense: história, impacto e herança para a música do Porto do século XX”. Pola súa parte, Laura Touriñán e Sergio Camacho formaron parte do comité científico.
O encontro conseguiu reunir a máis de 50 persoas procedentes de diferentes institucións portuguesas e españolas, ofrecendo actividades a maiores das conferencias e recitais. Deste xeito, houbo un taller de danza histórica impartido por Portingaloise e centrado en contradanzas inglesas/francesas, dúas visitas guiadas a espazos setecentistas (sala de música do Pazo dos Carrancas e Igrexa de Santa Clara), un concerto de órgano dado por Ángel Justo-Estebaranz (procedente de Sevilla) con repertorio da Idade Moderna e, para concluír, o Porto de Honra con momento musical ofrecido polo Quarteto Metamorfose (ESMAE). Os tres días permitiron establecer redes e idear proxectos de futuro entre os asistentes.
