A exposición Cantantes Líricas Galegas dos séculos XIX e XX poderá volver visitarse, nesta ocasión na Casa de Galicia de Lisboa entre os días 10 de abril e 18 de maio. Esta nova iniciativa para por en valor e difundir o legado das nosas cantantes de ópera e zarzuela, poido visitarse no Colexio de Fonseca o pasado outono, e agora visita Lisboa como actividade paralela ao Coloquio Internacional Cruzamentos Galicia-Portugal: redes migratorias e culturais que terá lugar na Universidade Nova de Lisboa os días 10 e 11 de abril.
Nas xornadas de traballo, os comisarios da mostra exporán na sesión previa á inauguración oficial da exposición que terá lugar o dia 10, ás 19:15 h. da tarde, os seus traballos “Mirando aos dous lados do Atlántico: cantatrices líricas galegas dos séculos XIX e XX en Portugal e América” (F. J. Garbayo) e “Fronteiras musicais desdibuxadas: as xiras das compañías líricas entre Galicia e o norte de Portugal na segunda metade do século XIX” (M. C. Lorenzo).
Para esta ocasión a exposición adáptase ao contexto do Coloquio, incluíndo un novo panel titulado Voces da morriña adicado ás cantantes galegas que actuaron en América do Sur e Centroamérica, onde había comunidades galegas, incluíndose nas vitrinas nova documentación relativa á súa relación con Portugal e Brasil en, en xeral, América. Para a ocasión, editouse tamén un folleto explicativo que recolle a galería de retratos das nosas grandes cantantes líricas e que será distribuído entre os visitantes.
Esta nova exhibición da mostra é posible grazas ao patrocinio e apoio da Secretaría Xeral de Emigración da Xunta de Galicia e a Casa de Galicia de Lisboa.
